Ադրբեջանը, Վրաստանը և Թուրքիան կավելացնեն բեռնափոխադրումները ԲԹԿ-ով

Ադրբեջանի, Վրաստանի և Թուրքիայի երկաթուղիները ստորագրել են փոխըմբռնման հուշագիր։

Caliber.Az-ի փոխանցմամբ, այս մասին տեղեկացնում է «Ադրբեջանական երկաթուղիներ» ՓԲԸ-ն։

Հուշագիրը ստորագրվել է Ալմաթիում անցկացվող տրանսպորտային շաբաթվա ընթացքում։ Փաստաթղթի տակ իրենց ստորագրությունն են դրել «Ադրբեջանական երկաթուղիներ»-ի նախագահ Ռովշան Ռուստամովը, «Վրաստանի երկաթուղիներ»-ի գլխավոր տնօրեն Լաշա Աբաշիձեն և «Թուրքիայի պետական երկաթուղիներ»-ի գլխավոր տնօրեն Ուֆուկ Յալչընը։

Հուշագրի նպատակն է բեռնափոխադրումներ կազմակերպել Բաքու-Թբիլիսի-Կարս երկաթգծով։

«Այս փաստաթղթում կողմերը պայմանավորվել են բարձրացնել Բաքու-Թբիլիսի-Կարս երթուղու մրցունակությունը՝ համեմատած այլ տրանսպորտային միջանցքների հետ, ներգրավել լրացուցիչ բեռնահոսք՝ առաքման ժամկետների օպտիմալացման և մրցակցային սակագների կիրառման հաշվին, որոնք կապահովեն բեռնափոխադրման կայուն պայմաններ և թափանցիկ գնագոյացում», - նշվում է տեղեկատվության մեջ։