Energy Intelligence Group. Ադրբեջանը Թուրքիային օգտագործել է որպես էներգետիկ դիվանագիտության իդեալական գործընկեր

Ադրբեջանը կարևոր դեր է խաղացել Եվրոպայի կախվածությունը ռուսական գազից նվազեցնելու գործում։
 
Report-ի փոխանցմամբ՝ այս մասին Բաքվում՝ «Կասպի և Կենտրոնական Ասիա. նավթավերամշակում, նավթաքիմիա, արտադրանք, առևտուր, լոգիստիկա»  խորագրով միջոցառման ժամանակ հայտարարել է՝ Energy Intelligence Group-ի նավթային շուկաների տնտեսագետ Ժյուլիեն Մաթոնիեն։
 
Նրա խոսքով՝ Կասպից ծովի տարածաշրջանում պահպանվող աշխարհաքաղաքական հավասարակշռության ֆոնին՝ Եվրոպա գազի մատակարարումները աճում են։
 
Նա նշել է, որ Թուրքիան նաև կարևոր միջնորդական դեր է խաղացել Ադրբեջանի այս քաղաքականության մեջ։
 
«Եվրոպայի գազի մատակարարումների մեծ մասն անցնում է Թուրքիայի միջով։ Անկարան ամուր էներգետիկ և քաղաքական կապեր ունի և՛ Բաքվի, և՛ Մոսկվայի հետ, և սա դիվանագիտական ​​բուֆերի դեր է կատարում։ Ադրբեջանը Թուրքիային օգտագործել է որպես էներգետիկ դիվանագիտության իդեալական գործընկեր, և ես կարծում եմ, որ սա շատ հաջող է իրագործվել», - հավելել է Մաթոնիեն։