Ֆուաթ Օքթայ. Անհրաժեշտ է արագ ավարտել աշխատանքները՝ Բաքու-Թբիլիսի-Կարս երկաթուղու լիարժեք գործարկման համար

 Թուրքիայի, Ադրբեջանի և Վրաստանի միջև՝ Բաքու-Թբիլիսի-Կարս երկաթուղու լիարժեք գործունեությունը ապահովելու ուղղությամբ աշխատանքները պետք է ավարտվեն կարճ ժամանակում։ 

Այս մասին Անկարայում՝ Ադրբեջանի, Թուրքիայի և Վրաստանի խորհրդարանների արտաքին հարաբերությունների կոմիտեների նախագահների հանդիպման ժամանակ հայտարարել է՝ Թուրքիայի Ազգային մեծ ժողովի արտաքին կապերի  կոմիտեի նախագահ Ֆուաթ Օքթայը։ Նրա խոսքով, հանդիպմանը տեղի է ունեցել նաև մտքերի փոխանակում՝ փոխադարձ համագործակցության հեռանկարների շուրջ։

«Մենք մտքեր փոխանակեցինք մեր համագործակցության հնարավոր զարգացման վերաբերյալ այնպիսի ոլորտներում, ինչպիսիք են առևտուրը, տնտեսությունը, պաշտպանությունը, տեխնոլոգիաները, կրթությունը, զբոսաշրջությունը և թվային տնտեսությունը: Մենք քննարկել ենք նաև համագործակցությունը զորավարժությունների և անվտանգության ոլորտում»,- ասել է Ֆ.Օքթայը։ Նա նշել է նաև Կովկասում կայունության ապահովման կարևորությունը։