Շահբազով. Զանգեզուրի միջանցքը կձևավորի «Կենտրոնական Ասիա-Ադրբեջան-Թուրքիա» էներգետիկ կամուրջ

«Կենտրոնական Ասիա-Ադրբեջան» «կանաչ էներգիայի» միջանցքը պատմության մեջ առաջին անգամ կապահովի՝ տարածաշրջանի էլեկտրաէներգետիկ համակարգերի  միավորումը, իսկ Զանգեզուրի միջանցքը, որը ծառայում է որպես այս էներգիայի հոսքը Թուրքիա հասցնելու ուղի, կձևավորի «Կենտրոնական Ասիա-Ադրբեջան-Թուրքիա» էներգետիկ կամուրջը։
 
Report-ի փոխանցմամբ, այս մասին հայտարարել է էներգետիկայի նախարար Փարվիզ Շահբազովը՝ այսօր Ստամբուլում Թուրքական պետությունների կազմակերպության էներգետիկայի նախարարների 5-րդ  նիստում իր ելույթի ժամանակ։
 
Նրա խոսքով՝ այս նախագծերի վերաբերյալ  ընթանում են բոլոր անհրաժեշտ աշխատանքները։ Շահբազովը նշել է, որ այս միջանցքների ստեղծումը և դրանց փոխկապակցվածությունը կնպաստեն տարածաշրջանային էներգետիկ առևտրի զարգացմանը և կարագացնեն վերականգնվող էլեկտրաէներգիայի համաշխարհային հոսքերը։ Այս նախագծերը ուժեղացնում են մասնակից երկրների ռազմավարական նշանակությունը Եվրոպային էներգետիկ ռեսուրսներով ապահովելու գործում և ձևավորում են՝ Եվրասիական տարածաշրջանում էներգետիկ համագործակցության նոր աշխարհատնտեսական ճարտարապետություն։
Նա ընդգծել է, որ թուրքական պետությունների հետ էներգետիկ համագործակցությունը զարգանում է և ներառում է տարածաշրջանային նախաձեռնություններ։ Նախարարը հիշեցրել է, որ նախորդ հանդիպումից ի վեր ստորագրվել է էներգետիկ համագործակցության 15 փաստաթուղթ, այդ թվում՝ Ադրբեջանի, Ղազախստանի և Ուզբեկստանի միջև կանաչ էներգիայի զարգացման և փոխանցման վերաբերյալ ռազմավարական միջկառավարական համաձայնագիր, Ղազախստանի հետ էներգետիկ ոլորտում ռազմավարական գործընկերության համաձայնագիր, Թուրքիայի հետ կանաչ էլեկտրաէներգիայի փոխանցման և առևտրի վերաբերյալ փոխըմբռնման հուշագիր, ինչպես նաև Ղրղզստանի հետ «ճանապարհային քարտեզ»։
 
Նրա խոսքով՝ Անդրկասպյան միջանցքը՝ Նախչըվանից և Հայաստանով անցնող ուղիղ երթուղիները, Ադրբեջան-Թուրքիա-Եվրոպա և Ադրբեջան-Վրաստան-Թուրքիա-Բուլղարիա միջանցքները, ինչպես նաև կանաչ էներգիայի միջանցքների նախագծերը և Կասպից-Սև ծով-Եվրոպա միջկապող գծերը ծառայում են՝ էներգետիկ ոլորտում թուրքական պետությունների միասնության ամրապնդմանը։