TANAP-ով Թուրքիա և Եվրոպա է մատակարարվել 77,6 միլիարդ խորանարդ մետր գազ

Անդրանատոլիական գազատարի (TANAP) կոմերցիոն շահագործման մեկնարկից ի վեր, ընդհանուր առմամբ, 77,6 միլիարդ խորանարդ մետր գազ է մատակարարվել Թուրքիա և Եվրոպա:
 
Ըստ Report-ի՝ այս մասին հայտարարել է TANAP A.Ş կոնսորցիումի գլխավոր տնօրեն Սալթուկ Դյուզյոլը, Բաքվում անցկացված՝ Հարավային գազային միջանցքի և Կանաչ էներգիայի հարցերով խորհրդատվական խորհուրդների շրջանակում կայացած նախարարական  նիստի ժամանակ։
 
Նա ընդգծել է, որ TANAP-ը հանդիսանում է Հարավային գազային միջանցքի առանցքային օղակը՝ համակարգի ամենաերկար (3500 կմ) և տրամագծով ամենալայն հատվածը։   «2018 թվականի հունիսի 30-ից, երբ սկսվել է գազամուղի  կոմերցիոն շահագործումը, TANAP-ը գործում է հուսալի և անվտանգ: Պիլոտային շահագործումը սկսվել է 2020 թվականի հունիսի 30-ին, տարեկան մատակարարման ծավալը կազմում է 5,7 միլիարդ խորանարդ մետր: Այսօրվա դրությամբ, Թուրքիային մատակարարվել է 32,2 միլիարդ խորանարդ մետր գազ, որից 6 միլիարդը տրամադրվել է ճկուն գրաֆիկով»,- նշել է գլխավոր տնօրենը։