Պակիստանը նախատեսում է Ադրբեջանի հետ ապրանքաշրջանառությունը հասցնել երկու միլիարդ դոլարի

Պակիստանի վարչապետ Շահբազ Շարիֆը հանձնարարել է առևտրի նախարարությանը մշակել համապարփակ ծրագիր՝ Ադրբեջանի հետ ապրանքաշրջանառությունը 2 մլրդ դոլարի հասցնելու վերաբերյալ։

Ինչպես հաղորդում է Caliber.Az-ը՝ վկայակոչելով պակիստանյան ԶԼՄ-ներին, նման որոշում է կայացվել մարտի 4-ին կայացած կառավարության նիստում՝ նվիրված Շարիֆի՝ վերջերս Ադրբեջան կատարած այցի արդյունքներին։

«Շահբազ Շարիֆը հայտարարել է, որ Բաքվում ստորագրված փոխըմբռնման հուշագրերն ու համաձայնագրերն անմիջապես կյանքի կկոչվեն։ Պակիստանում 2 միլիարդ դոլար ներդնելու մտադրության մասին Ադրբեջանի նախագահի հայտարարության լույսի ներքո վարչապետը ձևավորել է կոմիտե՝ փոխվարչապետ և արտաքին գործերի նախարար Իսհակ Դարի գլխավորությամբ։ Կոմիտեն կզբաղվի էներգետիկայի և ենթակառուցվածքների ոլորտներում համաձայնագրերի մշակմամբ»,- նշում են հրապարակումները։

Ըստ ԶԼՄ-ների՝ Շարիֆը նաև հանձնարարել է երկրի առևտրի նախարարությանը ներկայացնել համապարփակ ծրագիր՝ Ադրբեջանի հետ ապրանքաշրջանառության ծավալը հասցնելու մինչև 2 միլիարդ դոլարի։

Բացի այդ, վարչապետը կարգադրել է առաջնահերթության կարգով ավարտել Ադրբեջանի նախագահի՝ հաջորդ ամիս Պակիստան կատարելիք այցի նախապատրաստական բոլոր աշխատանքները։