Շահբազով. Ջաբրայիլի էներգետիկ հանգույցը կարևոր է Ադրբեջանից Եվրոպա «կանաչ» էներգիա մատակարարելու համար

«Կանաչ» էներգիայի Ադրբեջանից Թուրքիա և այնուհետև Եվրոպա արտահանման համար ենթակառուցվածքների ստեղծումը մնում է երկու երկրների էներգետիկ օրակարգի հիմնական առաջնահերթություններից մեկը։

Ինչպես հաղորդում է Report-ը, այս մասին հայտարարել է Ադրբեջանի էներգետիկայի նախարար Փարվիզ Շահբազովը Իզմիրում կայացած Ադրբեջան-Թուրքիա չորրորդ էներգետիկ ֆորումում։

Նրա խոսքով՝ առաջին փուլում նախատեսվում է Նախչըվանում արտադրվելիք 1000 ՄՎտ էլեկտրաէներգիա արտահանել Թուրքիա և Եվրոպա։ Դրա համար անհրաժեշտ է արագացնել նախապատրաստական գործընթացները։

«Գործընթացների արագացումը հատկապես արդիական է դառնում նոր իրողությունների պայմաններում։ Նախչըվանի և Թուրքիայի միջև արդյունավետ էներգետիկ կապերը մնում են հիմնական խնդիրներից մեկը, որոնք սպասում են լուծման՝ Ադրբեջանի այլ շրջաններից, Կասպից ծովից, ինչպես նաև Ղազախստանից և Ուզբեկստանից Ջաբրայիլի էներգետիկ հանգույցի միջոցով՝ Հայաստանի տարածքով Նախչըվան և այնուհետև Թուրքիա և Եվրոպա կանաչ էներգիայի մատակարարման համար», - նշել է նա։