Մոսկվան և Բաքուն մի շարք փաստաթղթեր են ստորագրել տնտեսության ոլորտում

Միներալնիե Վոդիում` ռուս-ադրբեջանական XII միջտարածաշրջանային համաժողովի շրջանակում ստորագրվել է հինգ երկկողմանի փաստաթուղթ, հայտնում է ՏԱՍՍ-ը։

Ստորագրման արարողությունը կայացել է երկու երկրների փոխվարչապետներ Ալեքսեյ Օվերչուկի և Շահին Մուստաֆաևի մասնակցությամբ` լիագումար նիստի արդյունքներով։ Փաստաթղթերի թվում ստորագրվել են՝ համաձայնագրեր Ադրբեջանի արտահանման և ներդրումների խրախուսման գործակալության (AZPROMO) և «Ստավրոպոլի երկրամասի Առևտրաարդյունաբերական պալատի», «Կավկազ ՌԴ» ԲԸ-ի և Ադրբեջանի փոքր և միջին բիզնեսի զարգացման գործակալության, ինչպես նաև մի քանի այլ փաստաթղթեր:

Ռուսաստանի և Ադրբեջանի միջև միջտարածաշրջանային ֆորումները, որոնք կազմակերպվում են երկու երկրների ղեկավարների նախաձեռնությամբ, անցկացվում են 2009 թվականից և օգնում են նոր կապեր հաստատել երկու երկրների տարածաշրջանների միջև և քննարկել համատեղ հեռանկարային նախագծեր։ Առաջին ֆորումը կայացել է Բաքվում, և տարբեր տարիներին միջոցառումը հյուրընկալել են նաև Ռուսաստանի Աստրախան, Վոլգոգրադ, Եկատերինբուրգ և ադրբեջանական Գաբալա քաղաքները։ 11-րդ ֆորումն անցկացվել է Բաքվում։ Արդյունքում մի քանի երկկողմանի փաստաթղթեր են ստորագրվել։