Բաքվում ընթանում է «Մաքսային-բիզնես» խորագրով ֆորում

Բաքվում մեկնարկել է «Մաքսային-բիզնես 2025. Երկխոսություն և վստահություն» խորագրով ֆորում։

Report-ի փոխանցմամբ՝ ֆորումին մասնակցում են Ադրբեջանի նախագահի օգնական, նախագահի աշխատակազմի տնտեսական հարցերի և նորարարական զարգացման քաղաքականության վարչության ղեկավար Շահմար Մովսումովը, Պետական մաքսային կոմիտեի (ՊՄԿ) նախագահ Շահին Բաղիրովը, bp-ի Կասպյան տարածաշրջանում հաղորդակցության և արտաքին հարաբերությունների գծով փոխնախագահ Բախտիյար Ասլանբեյլին և այլ պաշտոնատար անձինք։

Ֆորումի շրջանակներում կներկայացվեն մաքսային ոլորտում ներդրվող թվային գործիքները, մաքսային ծառայության և համապատասխան պետական մարմինների կողմից արտաքին առևտրային գործառնությունները կարգավորելու և պարզեցնելու համար համատեղ իրականացվող նախագծերը, ինչպես նաև կքննարկվեն մաքսային ընթացակարգերը և բիզնեսին առնչվող գործարքները։

Գործարարների հետ համագործակցությունն էլ ավելի ընդլայնելու և հանրությանը մաքսային ոլորտում ներդրվող նորարարությունների մասին տեղեկացնելու համար Պետական մաքսային կոմիտեն ավանդաբար ամեն տարի կազմակերպում է «Մաքսային-բիզնես» ֆորումը, որին մասնակցում են կառավարության ներկայացուցիչներ, արտաքին առևտրի մասնակիցներ, փորձագետներ և գործընկերներ։