Բաքուն և Թբիլիսին քննարկել են ԲԹԿ երկաթուղու նախագծի լիարժեք մեկնարկը

Ադրբեջանն ու Վրաստանը քննարկել են՝ Բաքու-Թբիլիսի-Կարս երկաթուղու լիարժեք մեկնարկի համար  համատեղ ջանքերը։

Ինչպես հաղորդում է Caliber.Az-ը, այս մասին X սոցիալական ցանցում հայտարարել է թվային զարգացման և տրանսպորտի նախարար Ռաշադ Նաբիևը՝ Բաքվում Վրաստանի էկոնոմիկայի և կայուն զարգացման նախարար Մարիամ Քվրիվիշվիլիի հետ բանակցությունների վերաբերյալ։
 
«Մենք քննարկել ենք մեր երկրների միջև տրանսպորտի ոլորտում համագործակցության ներկայիս մակարդակը և հեռանկարները, ինչպես նաև Բաքու-Թբիլիսի-Կարս երկաթուղու նախագծի լիարժեք մեկնարկի համար համատեղ ջանքերը», - նշել է Նաբիևը։
 
Նախարարի խոսքով, բանակցությունների օրակարգում ներառված են եղել նաև՝ ավտոմոբիլային տրանսպորտի ոլորտում  նորմատիվ իրավական բազայի կատարելագործման, տեղեկատվական և հաղորդակցական տեխնոլոգիաների, թվային վերափոխման, արհեստական բանականության և նորարարության ոլորտներում հնարավոր համագործակցության հարցերը։