Շահբազով. Ադրբեջանական գազն ապահովել է Հունաստանի սպառման շուրջ 20 տոկոսը
Ադրբեջանական գազը 2023 թվականին ապահովել է Հունաստանի տարեկան սպառման շուրջ 20%-ը։
Ինչպես հաղորդում է Caliber.Az-ը, այս մասին հայտարարել է Ադրբեջանի էներգետիկայի նախարար Փարվիզ Շահբազովը։
«Անցյալ տարի Հունաստանում գազի սպառման մոտավորապես 18%-ն ապահովվել է ադրբեջանական գազով։ Ակնկալվում է, որ մինչև այս տարվա վերջ Հունաստան կարտահանվի 1,2 միլիարդ խորանարդ մետր գազ»,- ասել է Շահբազովը Բաքվում անցկացված՝ Ադրբեջանի և Հունաստանի միջկառավարական հանձնաժողովի հինգերորդ նիստում Հունաստանի փոխարտգործնախարար Կոստաս Ֆրագոգյանիսի հետ հանդիպմանը:
Շախբազովը նաև նշել է, որ 3,5 տարվա ընթացքում Եվրոպա մատակարարվող գազի ընդհանուր ծավալից (36,8 միլիարդ խորանարդ մետր գազ) ավելի քան 3,6 միլիարդ խորանարդ մետրը կամ 10 տոկոսը բաժին է ընկել Հունաստանին։
Հանդիպման ընթացքում ընդգծվել է նաև, որ երկու երկրների միջև ապրանքաշրջանառությունը նախորդ տարի կազմել է 1,4 մլրդ ԱՄՆ դոլար, իսկ Հարավային գազային միջանցքը կարևոր դեր է խաղում Եվրոպայի, այդ թվում՝ Հունաստանի էներգետիկ անվտանգության գործում։