«Spiegel». Հայաստանը գնում է գերմանական ապրանքներ և շրջանցելով պատժամիջոցները վաճառում Ռուսաստանին

Ռուսաստանի Դաշնությանը հարևան երկրները գնալով ավելի շատ են գնում գերմանական ապրանքներ և, հավանաբար, շրջանցելով արևմտյան պատժամիջոցները, դրանք վաճառում են Մոսկվային։

Այս մասին ասվում է «Spiegel»-ի հոդվածում։

Հոդվածում ասվում է, մասնավորապես, Հայաստանի մասին, որը երկու տարվա ընթացքում քառապատիկ անգամ, մոտավորապես մինչև 2,5 միլիարդ դոլարի ավելացրել է իր արտահանումը դեպի Ռուսաստան։

Բացի ավանդական մրգերից ու ընկույզից, ինչպես նաև «Արարատ» ապրանքանիշի գինուց ու կոնյակից, վերջին մեկ տարվա ընթացքում Հայաստանը սկսել է արտահանել բարձր տեխնոլոգիական և արդյունաբերական բոլոր տեսակի ապրանքներ։

2022 թվականին Հայաստանը ռուս սպառողներին մատակարարել է 460 մլն դոլարի էլեկտրոնային սարքավորումներ։ Տեխնիկայի վաճառքը 14 մլն դոլարից ավելացել է մինչև 158 մլն դոլարի:

Դեկտեմբերին գերմանական ընկերությունների արտահանման եկամուտները հայկական բիզնեսից 287%-ով բարձր է եղել 2018-2020 թվականների միջին ցուցանիշից։

Բացի Հայաստանից, Ղազախստանը նույնպես սկսել է ավելի շատ գերմանական ապրանք գնել։ Գերմանական ընկերությունների արտահանման եկամուտը 2018-2020 թվականների միջին ցուցանիշի համեմատ աճել է 210%-ով։ Ղրղզստանում աճը կազմում է 1157%։

Առևտրային հոսքերի փոփոխություններն այնքան զանգվածային են, որ Վերակառուցման եվրոպական բանկի (ՎԶԵԲ) վերլուծաբանները խոսում են «Եվրասիական շրջանցման ճանապարհի» մասին։

Գերմանական բիզնեսի ներկայացուցիչները նշում են, որ առեւտրական բումը կարելի է բացատրել նաև այլ գործոններով։

Մասնավորապես, մինչ ներխուժումը գերմանական շատ ընկերություններ Ռուսաստանը օգտագործում էին որպես իրացման կենտրոն, որտեղից ապրանքները առաքվում էին Երևան և Աստանա։ Քանի որ պատժամիջոցների պատճառով դա այլևս հնարավոր չէ, առաքումները կատարվում են անմիջապես այդ երկրներ։

Ինչպես նաև և՛ Հայաստանում և՛ Ղազախստանում պոտենցիալ սպառողների թիվը մեծանում է Ռուսաստանից միգրանտների մեծ թվի պատճառով։

Միևնույն ժամանակ, ինչպես նշում է «Spiegel»-ը, դժվար թե այս պատճառները կարող են բացատրել՝ Ռուսաստանի Դաշնությանը հարևան երկրներում գերմանական ապրանքների վաճառքի նման ծավալը։