Ադրբեջանը ավելացրել է էլեկտրաէներգիայի արտադրությունն ու արտահանումը

Օպերատիվ տվյալների համաձայն՝ 2024 թվականի հունվարից օգոստոս ընկած ժամանակահատվածում Ադրբեջանում արտադրվել է 19235,4 մլն կՎտ/ժ էլեկտրաէներգիա։ 

Ինչպես հայտնում է Caliber.Az-ը, այս մասին «X» սոցիալական ցանցում հրապարակմամբ կիսվել  է՝ էներգետիկայի նախարար Փարվիզ Շահբազովը։

Տեղեկատվության համաձայն՝ հաշվետու ժամանակահատվածում էլեկտրաէներգիայի արտահանումը կազմել է 858,9 մլն կՎտ/ժ, իսկ ներմուծումը` 125,5 մլն կՎտ/ժ։  

«Նախորդ տարվա համապատասխան ժամանակահատվածի համեմատ վերականգնվող էներգիայի աղբյուրներից, այդ թվում՝ ջրից, երկու անգամ ավելի շատ էլեկտրաէներգիա է ստացվել՝ 2771,8 մլն կՎտ/ժ։ Այսպիսով, այս ընթացքում էլեկտրաէներգիայի արտադրության մեջ «կանաչ էներգիայի» մասնաբաժինը կազմել է 14 տոկոս»,- ասվում է հրապարակման մեջ։