AZAL-ի ինքնաթիռը վթարի է ենթարկվել Ակտաուում ՏԵՍԱՆՅՈՒԹ / ԹԱՐՄԱՑՎԱԾ

«Այսօր չափազանց ծանր և ողբերգական օր է AZAL-ի համար»
 
Ինչպես հայտնում է Caliber.Az-ը, այս մասին ասված է՝ ավիաընկերության հայտարարության մեջ, որում նշվում է.
 
«Մենք սգում ենք՝ Ակտաու քաղաքի մոտ Embraer-190 ինքնաթիռի կործանման հետևանքով զոհված ուղևորների և անձնակազմի անդամների ընտանիքների և սիրելիների հետ և խորին ցավակցություն ենք հայտնում նրանց։
 
Նրանց ցավը մեր ցավն է։ Տուժածներին մաղթում ենք շուտափույթ ապաքինում»։

15:47

Ադրբեջանից հատուկ պատվիրակություն է ժամանել Ակտաու, հայտնում են ղազախական ԶԼՄ-ները։ 

Պատվիրակությունը գլխավորել է Ադրբեջանի արտակարգ իրավիճակների նախարար Քեմալեդդին Հեյդարովը։ Մարզի աքիմ Նուրդաուլեթ Քիլըբայը հայտնել է, որ տուժած քաղաքացիներին անհրաժեշտ բուժօգնություն է ցուցաբերվում։ 

Աստանայի բնակիչները ծաղիկներ են բերում Ադրբեջանի դեսպանատան շենքի մոտ:

13։15

Ղազախստանի նախագահ Կասիմ-Ժոմարտ Տոկաևի հանձնարարությամբ ստեղծվել է հատուկ հանձնաժողով, այն կգլխավորի փոխվարչապետ Կանատ Բոզումբաևը (ըստ տեղեկությունների՝ նա արդեն մեկնում է Ակտաու), հայտնում են ղազախական լրատվամիջոցները։

Կասիմ-Ժոմարտ Տոկաևը նաև կարգադրել է Աստանայից բժիշկներ ուղարկել Ակտաու և անհրաժեշտ օգնություն ցուցաբերել ողբերգությունից տուժածներին։

12:57

Ինչպես Caliber.Az-ին հայտնել է ղազախական կողմը, նախնական տվյալներով ավիավթարից ողջ է մնացել 25 մարդ։ Նրանցից շատերը ծանր վնասվածքներ են ստացել։

Օդանավում գտնվող մնացած մարդիկ, ըստ նախնական տվյալների, մահացել են։

Հաղորդվում է, որ կործանված ինքնաթիռում եղել է Ադրբեջանի 37, Ռուսաստանի 16, Ղազախստանի 6 և Ղրղզստանի 3 քաղաքացի։

11:45

Ինքնաթիռում եղել է 62 ուղևոր և անձնակազմի 5 անդամ՝ ընդհանուր առմամբ 67 մարդ։

Այս մասին Caliber.Az-ին հայտնել են AZAL-ի մամուլի ծառայությունից՝ նշելով, որ ուղևորների մեջ երեխաներ չկան։

Զոհերի մասին տեղեկություն կտրամադրվի շուտով։ Կան ողջ մնացածներ, նրանց առաջին բուժօգնություն է ցուցաբերվում։

Ղազախական կողմը ձեռնարկում է օպերատիվ միջոցներ՝ կապի մեջ լինելով Ադրբեջանի համապատասխան կառույցների հետ

11:45

Azerbaijan Airlines ընկերության Embraer 190 ինքնաթիռը, որն իրականացնում էր թիվ J2-8243 Բաքու-Գրոզնի չվերթը, հարկադիր վայրէջք է կատարել Ակտաու քաղաքից մոտ 3 կմ հեռավորության վրա։

Այս մասին Caliber.Az-ին հայտնել է AZAL-ի մամուլի ծառայությունը:

Նախնական տեղեկություններով՝ միջադեպի պատճառը եղել է ինքնաթիռի՝ թռչունների երամին բախվելը:

Միջադեպի մասին հավելյալ տեղեկատվություն կտրամադրվի հանրությանը։

11:20

Բաքվից Գրոզնի թռչող «Ադրբեջանական ավիաուղիներ»-ի ինքնաթիռը կործանվել է Ակտաուում։

Տեղական լրատվամիջոցների փոխանցմամբ՝ մինչ այդ նա արտակարգ վայրէջք է խնդրել։ Մանրամասները ճշտվում են։

Սպասվում է պաշտոնական տեղեկատվություն AZAL-ից։