«Սա Հայաստանի սադրանքն էր Բելառուսի դեմ» Caliber.Az-ը Մինսկից

Ռուսաստանն ուզում է հաշտեցնել Փաշինյանին ու Լուկաշենկոյին, Մինսկին ու Երևանին: Այս մասին օրերս հայտարարել է ՌԴ փոխարտգործնախարար Միխայիլ Գալուզինը` հավելելով, որ ԱԳՆ-ն դժվարանում է բացատրել Հայաստանի վարչապետ Նիկոլ Փաշինյանի կոշտ դիրքորոշումը բելառուս գործընկերների նկատմամբ: Նրա խոսքով, ՌԴ ԱԳՆ-ն հուսով է, որ ժամանակավոր տարաձայնությունները բացասաբար չեն ազդի ընդհանուր ինտեգրացիոն միավորումների շրջանակներում փոխգործակցության առաջմղման վրա, և նշել է, որ ռուսական կողմը Հայաստանին և Բելառուսին կոչ է անում «նայել հորիզոնից այն կողմ, գիտակցել այն պահի կարևորությունը, երբ ի հայտ են գալիս նոր աշխարհակարգի ուրվագծերը, որի կառուցման մեջ Ռուսաստանի Դաշնությունը ցանկանում է տեսնել երկու երկրներին»։

Իհարկե, Մոսկվայի նախաձեռնությունը գովելի է, բայց ինչպե՞ս են դրան վերաբերվում Մինսկում, որին Երևանը, ի թիվս այլ բաների, վերջերս մեղադրում էր «Հայաստանի դեմ պատերազմ նախապատրաստելու» մեջ։ Նախագահ Լուկաշենկոն կների՞ Փաշինյանին նման հայտարարությունների համար։ Caliber.Az-ի թղթակիցը բելառուս քաղաքագետներին խնդրել է պատասխանել այս հարցերին:

ԱՊՀ Միջխորհրդարանական վեհաժողովի մշտական հանձնաժողովի փորձագետ Օլեգ Լեշենյուկի կարծիքով՝ Բելառուսի նախագահ Լուկաշենկոյի և Հայաստանի վարչապետի միջև կոնֆլիկտ, որպես այդպիսին, չկա։

«Պարզապես Փաշինյանը բազմաթիվ մեղադրանքներ է հնչեցրել նախագահի հասցեին: Պատճառները բավականին մտացածին են, և այսպես կոչված կոնֆլիկտ ինքնին ավելի շուտ Հայաստանի կողմից սադրանք է Բելառուսի դեմ: Փաշինյանի նման քայլերն անհրաժեշտ են արևմտյան արժեքներին և կուրսին հավատարմությունը դրսևորելու համար և, ընդհանուր առմամբ, բավական հետևողական են՝ ամրապնդելու ՀԱՊԿ-ից դուրս գալու ցանկությունը»,- նկատել է քաղաքագետը։

Քաղաքական և տնտեսական տեսաբան, ՌՀԲԻ-ի (Ռազմավարական հետազոտությունների բելառուսական ինստիտուտ) վերլուծաբան Ալեքսեյ Ավդոնինի կարծիքով, ակնհայտ է, որ Երևանը ինչ-որ փուլում անհասկանալի որոշում է կայացրել՝ սրելու երկու պետությունների հարաբերությունները։

«Հասկանալի է, որ հնչեցված մեղադրանքներն անհիմն էին, և բելառուսական կողմը բոլոր դիվանագիտական խողովակներով պատասխանեց դրանց հնարավորինս համարժեք։ Բայց, իհարկե, մեր՝ տարբեր ինտեգրացիոն միավորումների մասնակիցներիս շահերից է բխում ոչ թե սրել իրավիճակը, այլ, ընդհակառակը, լուծել մեր երկրների միջև տարաձայնությունները, և Ռուսաստանի Դաշնության ջանքերը, իհարկե, միայն կնպաստեն այս գործընթացին:

Թեև կարող եմ ասել, որ այս պահին, ըստ էության կոնֆլիկտ չկա, քանի որ հետագայում, Երևանի հայտարարություններից հետո, Բելառուսի ԱԳՆ-ն աշխատանքներ տարավ հայկական կողմի հետ։ Եվ հետագա քայլեր կձեռնարկվեն երկրների միջև հարաբերությունների սրացումից խուսափելու համար»,- վստահեցրել է քաղաքագետը։

Նրա խոսքով, բելառուսական կողմը հիանալի հասկանում է, որ հարձակումները կրել են որոշակի զգացմունքային բնույթ, չեն ներառվել միջպետական հարաբերությունների արձանագրությունների մեջ, և քանի որ նման հայտարարությունների պատճառները պարզ չեն, Մինսկը դրան արձագանքել է շատ հավասարակշռված ձևով: