Ինչո՞ւ է Վուչիչը զանգահարել Ալիևին
Պարզաբանում է Ստեվան Գայիչը

Հարցազրույց  17 Ապրիլի 2024 - 16:17

Նախօրեին՝ ապրիլի 16-ին, Սերբիայի նախագահ Ալեքսանդր Վուչիչը զանգահարել էր Ադրբեջանի նախագահ Իլհամ Ալիևին և տեղեկացրել նրան վերջին շրջանում Սերբիայի վրա կիրառվող ճնշումների մասին, աջակցություն խնդրել բարեկամ ադրբեջանցի ժողովրդից։ Նշելով, որ Ադրբեջանը և Սերբիան միշտ աջակցել են միմյանց տարածքային ամբողջականությանը և ինքնիշխանությանը՝ նախագահ Ալիևն ընդգծել է, որ այդ դիրքորոշումը կշարունակվի նաև ապագայում։ Այս համատեքստում նշվել է միջազգային կազմակերպությունների շրջանակներում երկու երկրների հաջող համագործակցությունը։

Նշենք, որ չորեքշաբթի՝ ապրիլի 16-ին, Եվրախորհրդի Խորհրդարանական վեհաժողովի նիստում քվեարկություն է տեղի ունեցել սերբական Կոսովո մարզի՝ կազմակերպությանը միանալու հարցի շուրջ։ ԵԽԽՎ-ն բացարձակ մեծամասնությամբ մերժել է սերբ խորհրդարանականների ներկայացրած որոշման բոլոր ուղղումները, որից հետո վեհաժողովը որոշում է ընդունել։ Կոսովոյի՝ Եվրախորհրդին անդամակցելուն կողմ է քվեարկել 171 պատգամավոր, դեմ՝ 131, ձեռնպահ՝ 29 պատգամավոր։ Որպեսզի Կոսովոն դառնա կազմակերպության անդամ, վերջնական որոշումը պետք է կայացնի Եվրոպայի խորհրդի Նախարարների կոմիտեն։

Ինչպիսի՞ օգնություն է ակնկալում Բելգրադը Բաքվից։ Caliber.Az-ի խմբագրությունը խնդրել է այս հարցին պատասխանել սերբ քաղաքագետ, պրոֆեսոր Ստեվան Գայիչին։ Նրա խոսքով, այն, որ Վուչիչը միջազգային ասպարեզում դիմել է Ալիևին, չպետք է զարմացնի որևէ մեկին։

«Այսօր Սերբիան գտնվում է արևմտյան երկրների հզոր ճնշման տակ։ Հատկապես այստեղ առանձնանում է Գերմանիան, որը մտադիր է ՄԱԿ-ում սերբերի դեմ բանաձև առաջ տանել՝ Սրեբրենիցայի ռազմական հանցագործությունները ներկայացնելով որպես ցեղասպանություն։ Նա նաև ցանկանում է Սրեբրենիցայի Ցեղասպանության միջազգային օր սահմանել: Փաստն այն է, որ երեք տարվա ընթացքում՝ 1992-ից 1995 թվականներին Սրեբրենիցայի բազմաթիվ ռազմական հանցագործություններ են կատարվել։ Օրինակ՝ 1992 թվականին՝ սերբերի դեմ։ 1995 թվականին սերբերը գրավեցին քաղաքը և, իրոք, ռազմական հանցագործություն կատարվեց, երբ գնդակահարվեցին ռազմագերիներ։ Բայց սա չի կարող որակվել որպես ցեղասպանություն։

Գերմանիան մտադիր է ՄԱԿ-ում բացել Պանդորայի արկղը, քանի որ այդ ժամանակ Սերբիան էլ կսկսի բարձրացնել գերմանական ռազմական հանցագործությունների թեման նախկին Հարավսլավիայում Առաջին և Երկրորդ համաշխարհային պատերազմների ժամանակ։ Այն ժամանակ գերմանացիներն այստեղ գնդակահարել են հազարավոր մարդկանց, այդ թվում՝ երեխաների։ Գերմանացիների հանցագործությունները շատ ավելի մասշտաբային և հրեշավոր են եղել։

Արևմուտքի այս բոլոր գործողությունները, անկասկած, քաղաքական բնույթ են կրում։ Նրանք պարզապես ցանկանում են պատժել Սերբիային Ռուսաստանի դեմ պատժամիջոցներ չսահմանելու համար։ Նրանք նաև ցանկանում են Սերբիային գժտեցնել մահմեդական աշխարհի իր ավանդական գործընկերների և բարեկամների հետ: Արևմուտքը հուսով է, որ մահմեդական երկրների կառավարությունները դեմ կքվեարկեն սերբերին։ Այսինքն՝ Արևմուտքը մեզ համար ծուղակ է պատրաստում։ Եվ քանի որ վերջին տարիներին ադրբեջանա-սերբական հարաբերությունները սրընթաց զարգանում են, տրամաբանական է, որ Վուչիչը դիմել է նախագահ Ալիևի օգնությանը»,- ասել է Գայիչը։

Caliber.Az

Դիտումներ: 157